Hukumar karbar korafe-korafen jama’a da yaki da cin hanci da rashawa ta jihar Kano, ta fara gudanar da bincike kan badakalar sayen magunguna na biliyoyin naira a kananan hukumomi 44 na jihar.
Shugaban hukumar Muhuyi Rimin-Gado ne ya bayyana hakan a Kano ranar Talata.
“Mun fara bincike mai zurfi kan zarge-zargen da ake yi game da samar da magunguna na biliyoyin naira zuwa kananan hukumomi 44.
Daga cikin wadanda ake sa ran za a yi musu tambayoyi kan badakalar da ake zargin sun hada da Musa Garba Kwankwaso, wanda dan uwan Sanata Rabiu Musa Kwankwaso ne da kuma shugaban ma’aikatan fadar gwamnati, Shehu Wada Sagagi.
- CP Salman Dogo Ya Gana Da Jami’an Yan Sanda Don Fadada Sintiri Da Tabbatar Da Tsaro A Kano
- Amnesty ta ja kunnen gwamnatin Najeriya kan ‘tsangwamar’ ƙungiyar ƙwadago
Musa Kwankwaso, wanda dan uwan kwankwaso ne ubangidan Abba Kabir Yusuf, an yi zargin cewa yana da hannu a badakalar sayen kayayyaki. Wani kamfani mai suna Novomed Pharmaceuticals, wanda Musa Kwankwaso darakta ne kuma ake kyautata zaton mallakarsa ne ya bayar da kwangilar samar da magunguna ga kananan hukumomi 44 na jihar.
Kwangilar da aka ce an bayar da ita ba tare da bin ka’ida ba, ta kunshi kowacce karamar hukuma tana biyan kusan Naira miliyan 9 duk wata, wanda ya kai Naira miliyan 396 a duk wata.
Wannan badakalar ta fito fili ne a lokacin da Bello Galadanchi, ya yi zargin cewa gwamnatin jihar ta umurci kowacce karamar hukuma daga cikin kananan hukumomi 44 da su biya kimanin Naira miliyan 10 domin samar da maganin, tare da bayar da kwangilar ne kadai ga kananan hukumomin. Novomed Pharmaceuticals.
A karshen makon da ya gabata ne Gwamna Abba kabir Yusuf ya nesanta kansa da kwangilar inda ya musanta sanin tun da farko kan yarjejeniyar tare da bayar da umarnin gudanar da bincike cikin gaggawa kan lamarin.
A wata tattaunawa ta musamman da Daily Trust,shugaban hukumar PCACC, Muhuyi Magaji ya ce sun gayyaci duk wadanda ake zargi domin amsa tambayoyi tare da gano gaskiyar lamarin.
Ya bayyana cewa gayyatar na daga cikin kashi na farko na binciken da nufin tattara muhimman bayanai da takardu da suka shafi kwangilar.