Sabon kwamishinan yan sandan jihar Kano, CP Ibrahim Adamu Bakori, ya tabbatarwa da al’umma jihar cewa zai yi yaki da masu aikata laifukan fadan daba wanda yake da alaka da kwacen waya da kuma shan miyagun kwayoyi .
Kwamishinan yan sandan ya bayyana hakan ne a ganawarsa ta farko da manema labarai, a wajen shakatarwar manyan jami’an sanda dake unguwar Bompai Kano.
Bakori, ya ce zai hada kai da sauran hukumomin tsaro don ci gaba da kare rayukan al’umma da dukiyoyinsu, inda ya bukaci hadin kan al’umma domin cimma nasarar da ake da bukata.
Kwamishinan yan sandan, ya kara da cewa tuni ya tattauna da manyan jami’an yan sandan jihar , don magance matsalar fadan daba, tare da gabatar da kudirin kara horas da yan sandan dabarun gudanar da aiki.
Haka zalika ya ce zai gana da baturen yan sanda musamman wadanda suke kan iyaka da jahohin da suke fama da matsalar tsaro da garkuwa da mutane.
Ya kuma ce zai amfani da fasahar sadarwa wajan gudanar da aikin sa, tare kuma da wayar da akan al’umna kasancenwar aikin tsaro na kowa ne ba iya yan sanda ba.
Dangane da shirye-shirye bukukuwan sallah dake karatowa kuma, Cp Bakori ya ce al’ummar jaihar Kano, za su yi bikin sallarsu cikin kwanciyar hankali da lumana domin sun yi dukkanin shirin da yakama don tabbatar da tsaro.
- Tinubu Ya Ayyana Dokar Ta-ɓaci A Jihar Ribas
- Mutanen Danzaki Sun Koka Kan Wani Aiki Da Ya Biyo Ta Cikin Gonakinsu, Makabarta Da Makaranta